राजबिराजमा ७ दिने आँखा तथा छाला सम्बन्धी निशुल्क शिविर, २ सय ४३ जनाको उपचार

राजबिराज, १० पुस । राजविराज स्थित सगरमाथा आँखा अस्पतालले शनिबार देखी ७ दिने निशुल्क आँखा तथा छाला सम्बन्धी परिक्षण स्वास्थ्य शिविरमा दुई दिनमा १ सय ४३ जनाले निशुल्क सेवा लिएको छ ।

उक्त शिविरमा आइतबार सम्ममा २ सय ४३ जना बिरामीले निशुल्क स्वास्थ्य उपचार पाएको अस्पताल प्रबन्धक अफाक अनवरले जानकारी दिएका छन् ।उनका अनुसार स्वास्थ्य उपचार पाएका मध्ये ३२ जना बिरामीमा मोतिया बिन्दु देखा परेको छ भने बाँकी बिरामीहरूलाई सामान्य उपचार गराई घर फर्किएका छन् ।

नेत्र विशेषज्ञ डा. संजय कुमार सिंहको नेतृत्वमा नेत्र विशेषज्ञ डा. आशिषराज पन्थ, छाला  विशेषज्ञ डा. रिपला आचार्य लगायत सात सदस्यीय टोलीले शिविरमा बिरामीहरूको चेक जाँच गरिरहेका छन् । यस अस्पतालमा मोतियाबिन्दु, जलविन्दु, कोर्नियल अल्सर, मेडिकल रेटिना, अकुलोप्लास्टिक, आँखाको नानी प्रत्यारोपण, बच्चाको आँखा जाँच लगायत आँखासम्बन्धी सम्पूर्ण रोगको उपचार तथा शल्यक्रिया हुने गरेको अस्पतालका मेडिकल सुपरिन्टेन्डेन्ट डा. पन्तले जानकारी दिए ।

राजविराजमा रहेका आँखाका बिरामीलाई अन्यत्र उपचारका लागि जान नपसोस् भन्ने उद्देश्यका साथ अस्पताल सञ्चालनमा ल्याएको उनको भनाई छ । साताको सातै दिन ओपिडी तथा सर्जरीको सुविधा सञ्चालनमा रहने हुदाँ बिरामीले आफूलाई पायक पर्ने समय र दिनमा आँखाको उपचार समेत गराउने सकिने व्यवस्था मिलाइएको छ ।

जिल्लामा गुणस्तरीय आँखा उपचार सेवा नभएर यहाँका बिरामीलाई अन्य शहर जानुपर्ने वाध्यता अब रहदैन भन्दै संचालक अनवरले बिरामीले फोन वा मेसेजको माध्यमले नाम दर्ता तथा जाँचको समय बुक गराउने सुविधा अस्पतालले प्रदान गराएको बताए ।

अस्पतालले पुष ९ गते देखि मेघा शिविर मार्फत आँखाको सम्पूर्ण उपचार सेवा शुभारम्भ गर्दै शिविरमा नाम दर्ता निःशुल्कका साथै शल्यक्रियामा छुटको व्यवस्था समेत मिलाइएको उनको भनाई रहेको छ ।