ईस्लाम धर्मावलम्वीको महान पर्व इदुलफित्र हर्षोल्लासका साथ मनाइँदै

राजविराज । आज शनिबार ईस्लाम धर्मावलम्वीको महान पर्व ईद अर्थात् ‘इदुलफित्र’ देशभर हर्षोल्लासका साथ मनाइँदै छ । बिहानैदेखि प्रमुख मस्जिद र इदगाहमा नमाज पढेर एक अर्कालाई इदको शुभकामना दिएका छन् ।

रमजान महिनाभर धैर्यता र संयमताका साथ व्रत बस्नेहरुले शुक्रबार इदको चन्द्रमा देखिएलगत्तै शनिबार बिहानैदेखि नमाज अदा गर्ने गरेको बताईएको छ ।

अप्रिल १० शुक्रबार रमजानको अन्तिम जुम्माको नमाज अर्थात् अलविदा जुम्माको नमाज पढेर साँझ इफ्तारपछि इदको चन्द्रमा देखियो । शनिबार देशैभर इद (उल फित्र) पर्व मनाइँदैछ ।

खुसीपूर्वक दान गरेर दीनदुःखी एवं गरीबलाई बाँडिने भएकाले यो पर्वलाई इदउल फित्र भनिएको हो। अरबी पात्रोअनुसार नवौँ महिनाको अन्तिम दिन चन्द्रमा देखिएपछि इदउल फित्र मनाउने कार्यक्रम तय हुन्छ ।

मुस्लिम समुदायको एक महिना लामो व्रत (रोजा) पूरा भएपछि यो पर्व मनाइन्छ ।यस पर्वका अवसरमा मुस्लिम समुदायले नयाँ कपडा लगाई साथीभाइकहाँ गएर इदको शुभकामना आदानप्रदान गर्छन्।