४ जना सवार मोटरसाइकल पिकअपसँग ठोकिँदा ३ जनाको मृत्यु, १ जना घाइते

इटहरी । सुनसरीको इटहरी उपमहानगरपालिका– १७ स्थित शुक्रबार राति भएको दुर्घटनामा मोटरसाइकलमा सवार चार जनामध्ये तीन जनाको मृत्यु भएको छ । 

दुर्घटनामा घाइते मोटरसाइकलमा सवार तीनैजनालाई धरानस्थित वीपी कोइराला स्वास्थ्य विज्ञान प्रतिष्ठान पठाइएको थियो । उपचारका क्रममा इटहरी १६ बस्ने अन्दाजी २६ वर्षीय करण चौधरी, सोही स्थानको २७ वर्षीय शम्भु चौधरी, २४ वर्षीय अनिनेश चौधरीको मृत्यु भएको प्रहरीले जनाएको छ ।

दुर्घटनामा सख्त घाइते भएका  २७ वर्षीय प्रेमलाल चौधरीको विराटनगर स्थित गोल्डेन अस्पतालमा उपचार भइरहेको छ । उनीहरु सबै एकै गाउँका रहेको बताइएको छ ।

कोशी प्रदेश ट्राफिक प्रहरी कार्यालयका अनुसार पश्चिमतर्फ जाँदै गरेको भारतीय नम्बर डब्लु बी ७३ इ ९११७ को पिकअपसँग पश्चिमबाट पूर्व आउँदै गरेको को २९ प ३७१२ नम्बरको मोटरसाइकल एकआपसमा ठोक्किएको थियो । मोटरसाइकल तीव्र गतिका कारण दुर्घटना भएको हुनसक्ने प्रारम्भिक अनुसन्धानबाट खुलेको छ ।