शम्भुनाथको ट्राफिक चौकमा अपराध न्यूनीकरण सम्बन्धी सचेतना कार्यक्रम 

सप्तरी । समुदाय प्रहरी साझेदारी कार्यक्रम अन्तर्गत ‘सडक तपाईँको सुरक्षार्थ ट्राफिक प्रहरीको प्रयास’ नाराका साथ सप्तरीको शम्भुनाथ नगरपालिकामा जनचेतनामूलक कार्यक्रम गरिएको छ ।

जिल्ला प्रशासन कार्यालय र जिल्ला प्रहरी कार्यालय सप्तरीको संयुक्त आयोजनामा  शम्भुनाथ नगरपालिका -३ स्थित ट्राफिक चौकमा स्थानीय तहमा अपराध न्यूनिकरण सम्बन्धी  जनचेतनामूलक कार्यक्रम गरिएको हो ।

कार्यक्रम बोल्दै प्रजिअ किरण थापाले अपराध न्यूनीकरणमा सबैले सकारात्मक भूमिका निर्वाह गर्नुपर्नेमा जोड दिए । कार्यक्रममा प्रहरी प्रमुख एसपी गजुसिद्धी बज्राचार्यले अपराधिक घटनाको सुइको पाउनसाथ प्रहरीलाई खबर गर्न आग्रह गरे ।

कार्यक्रम सप्तरीका प्रहरी प्रमुख प्रहरी उपरीक्षक गजुसिद्धी बज्राचार्यको अध्यक्षता तथा प्रमुख जिल्ला अधिकारी किरण थापाको प्रमुख आतिथ्य एवम् शम्भुनाथ नगरपालिकाकी कार्यवाहक मेयर अनिता कुमारी चौधरीको विशिष्ट आतिथ्यमा  आयोजना गरिएको थियो ।

उक्त कार्यक्रममा शम्भुनाथ नगरपालिका अन्तर्गतका स्थानीय जनप्रतिनिधि, सुरक्षाकर्मीहरू तथा भद्र भलादमीहरुको उपस्थिति रहेको थियो ।