त्रिकोणात्मक सिरिजको उपाधी राजबिराजलाइ, खडक ६ विकेटले पराजित

राजबिराज । राजबिराजमा संचालित त्रिकोणात्मक सिरिज तथा महिला क्रिकेट छनोट प्रतियोगिताको उपाधि राजबिराजले हात पारेको छ ।

शुक्रवार राजबिराज र खडक बिच भएको फाइनल खेलमा खडकलाई ६ बिकेटले पराजित गर्दै उपाधि माथि कब्जा जमाएको हो ।

राजबिराजले टस जिती पहिलो ब्याटिङको लागि खडकलाई निम्तो दिए संगै ब्याटिङ गर्न ओर्लेको खडकले निर्धारित २० ओभरको खेलमा ७ बिकेट गुमाई ९५ रनको योगफल तयार पारेका थिए ।

 जसमा खडकका लागि मन्जु रामले १५ रनको योगदान दिएका थिए भने अन्य कुनै खेलाडीले दोहोरो अङ्क छुन सकेका थिएनन् ।

बलिंग तर्फ राजबिराजका साक्षी यादवले उत्कृष्ट बलिंग गर्दै ४ ओभरमा १७ रन दिई ३ बिकेट लिएका थिए भने आकृति मण्डलले २ तथा दिपा राम र सितल चौधरीले सामान १ बिकेट लिएका थिए ।

९६ रनको झिनो लक्ष्य लिई मैदानमा ओर्लेको राजबिराजले उक्त लक्ष्य सजिलै १७ ओभर ४ बलमा ४ बिकेटको नोक्सानीमा भेटाएका थिए । राजबिराजलाई सहज जित दिलाउन कप्तान साक्षि यादवले ३४ बलमा ७ चौक्काको मद्दतले ४० रनको योगदान दिएका थिए भने निशु चौधरीले १७ रनको योगदान दिएका थिए ।

बलिंग तर्फ खडकका मन्जु राम र सन्तोषि चौधरीले सामान १ बिकेट लिएका थिए भने २ खेलाडी रन आउट भएका थिए ।

खेलको म्यान अफ द म्याच राजबिराजका साक्षी यादव भएका थिए भने प्रतियोगिताको उत्कृष्ट ब्याटर खडक क्वीनका अन्जली चौधरी उत्कृष्ट बौलर राजबिराज च्याम्पका दिपा राम तथा प्लेयर अफ द सिरिज साक्षी यादव भएका थिए ।

बिजेता खेलाडिलाई सप्तरी क्रिकेट संघका अध्यक्ष आयुश श्रेष्ठ, खडक नगरपालिकामा नगर प्रमुख जयप्रकाश चौधरी, सबल नेपालका सिनियर मैनेजर अशोक शाह, परमेश्वर झा, नेपाली राष्ट्रिय टिमका प्रमुख छनौटकर्ता दिपेन्द्र चौधरी, आईसिसि ट्युटर सारा बेग, पत्रकार मनोहर पोखरेल लगायतले पुरस्कार बितरण गरेका थिए ।

सबल नेपालको मुख्य आयोजना तथा सप्तरी क्रिकेट संघको समन्वयमा राजबिराज स्थित पबिमाबिको क्रिकेट मैदानमा पाँचौ महिनावारी दिवसको अवसरमा उक्त प्रतियोगिता संचालन गरिएको थियो ।

यस प्रतियोगिताबाट उत्कृष्ट प्रदर्शन गर्ने खेलाडीलाई पिएम कप प्रादेशिक छनोट प्रतियोगिताका लागि सप्तरी जिल्ला महिला क्रिकेट टिम चयन गरिएको सप्तरी क्रिकेट सँघका अध्यक्ष आयुष श्रेष्ठले जानकारी दिएको छ ।