शंभुनाथ मेलामा कृषि प्रदर्शनी सम्पन्न

राजबिराज । कृषि ज्ञान केन्द्र राजविराजले आयोजना गरेको कृषि मेला प्रदर्शनी सम्पन्न भएको छ । सप्तरीको शम्भुनाथ मेलामा बैशाख १५ देखि १८ गतेसम्म आयोजित कृषि मेला प्रदर्शनीको मंगलबार समापन गरिएको हो ।  

कृषि ज्ञानकेन्द्रका निमित्त प्रमुख किसुनदेव राउतको अध्यक्षता तथा शम्भुनाथ नगरपालिकाकी कार्यवाहक मेयर अनिता कुमारी चौधरीको प्रमुख आतिथ्यमा आयोजित समापन समारोहमा प्रदर्शनीमा राखिएका विभिन्न कृषि उत्पादनमा प्रथम, द्वितीय, तृतीय र सान्त्वना स्थान ल्याउने किसानहरूलाई क्रमशः १ हजार ५ सय, १ हजार २ सय, १ हजार र ८ सयका दरले नगद पुरस्कार र प्रमाणपत्र प्रदान गरिएको थियो ।  

बोदेबर्साइनकी सविता कुमारी साह आलुबालीतर्फ प्रथम, शम्भुनाथ ५ की मधु कुमारी चौधरी गहुँ बालीमा प्रथम, शम्भुनाथ ३ का जगदेव मण्डल कालो मसुरो बालीमा प्रथम, शम्भुनाथ १२ की मिनु कुमारी चौधरी उन्नत तोरी बालीमा प्रथम र सोही वडाकी सुरेखा कुमारी चौधरीलाई लोकल लसुन बालीमा प्रथम घोषित गरिएको थियो ।  

यसैगरी हनुमाननगर कंकालिनी नगरपालिका १४ का संजय कुम्मर पण्डित तर्बुजा बालीमा प्रथम, सोही नगरपालिका वडा नम्बर ३ का पशुपति कुमार महतो गोलभेडा बालीमा प्रथम, वडा नम्बर १ का बच्चालाल मण्डललाई केरा बालीमा प्रथम, कन्चनरुप नगरपालिका १२ का रमेश कुमार श्रेष्ठ आँपको अचारमा द्वितीय र शम्भुनाथ ४ की निर्मला चौधरीलाई प्याज बालीमा द्वितीय घोषणा गरिएको थियो ।  

कृषि ज्ञान केन्द्रका अधिकृत छैठौ सुब्बालाल मण्डलले संचालन गरेको कार्यक्रममा कृषि शाखा कंचनपुरका अधिकृत बेचन सढौतले स्वागत गरेका थिए । कृषि मेलामा ११ प्रकारका बाली समावेश गरिएको कृषि ज्ञान केन्द्रका प्रमुख राउतले जानकारी दिएका छन्  ।