शहीद रामकृष्ण राउतको नवौं स्मृति दिवस मनाइयो

सप्तरी । मधेश आन्दोलनका शहीद रामकृष्ण राउतको नवौं स्मृति दिवस मनाइएको छ । आइतबार सप्तरीको हनुमाननगर कंकालिनी नगरपालिका-१ भारदहस्थित कंकालिनी मन्दिरको हलमा स्मृति दिवस एक कार्यक्रम गरि मनाइएको हो ।

उक्त अवसरमा शहीद रामकृष्ण राउत स्मृति प्रतिष्ठान नेपालद्वारा प्रत्येक बर्ष वितरण गर्दै आएको छात्रवृत्ति यस वर्ष विपी माविका छात्र अमन देव र पुष्पाञ्जली माझीलाई प्रदान गरिएको छ । शहीद रामकृष्ण राउतको नवौं स्मृति दिवसको अवसरमा भारदहमा आयोजित एक समारोहका बीच मधेश प्रदेशका मुख्यमन्त्री सतिश कुमार सिंहले आनीहरूलाई छात्रवृत्ति प्रदान गरेका हुन् । 

प्रतिष्ठानका अध्यक्ष राज कुमार राउतको अध्यक्षतामा आयोजित कार्यक्रममा मुख्यमन्त्री सिंहले र हनुमाननगर कंकालिनी नगरपालिकाका मेयर विरेन्द्र माझीले जनही ५ हजार नगद राशीसहितको छात्रवृत्ति र प्रमाणपत्र, स्टेसनरी प्रदान गरे । 

कार्यक्रममा मधेश आन्दोलनका क्रममा घाइते भएका हनुमाननगर कंकालिनी नगरपालिका १ का वडा अध्यक्ष सुरेन्द्र मण्डल, गोपालराज मण्डल, देव नारायण विश्वासलाई मुख्यमन्त्री सिंहले दोसल्ला ओढाएर सम्मान गरेका थिए । 

प्रत्येक बर्ष शहिद रामकृष्ण राउतको स्मृति दिवसको अवसरमा एसइई परीक्षामा उत्कृष्ट अङ्क ल्याएर उत्तीर्ण २ जनालाई वितरण गर्दै आएको छात्रवृत्ति यसवर्ष भारदह स्थित विपी माविका  देव र माझीलाई प्रदान गरिएको प्रतिष्ठानका उपाध्यक्ष धर्मपाल राउतले जानकारी दिए । 

उक्त अवसरमा, जनमत पार्टीका नेता थानेश्वर प्रसाद साह, लक्ष्मी व्यापार संघ भारदहका अध्यक्ष कुन्दन मण्डल, पूर्व वडा अध्यक्ष भिमराज मण्डल, पुर्व गाविस अध्यक्ष पबन कुमार मण्डल, कंकालीनी मन्दिर व्यवस्थापन समितिका उपाध्यक्ष लक्ष्मण मण्डल, गजेन्द्र माझी, जयसुम्दर खिडहरी यादवलगायत विद्यार्थी तथा अभिभावकहरूको उपस्थित रहेको थियो ।  

पत्रकार जितेन्द्र कुमार झा जितुद्वारा संचालित कार्यक्रममा स्वागत प्रतिष्ठानका उपाध्यक्ष धर्मपाल राउतले गरे । 

२०७२ भदौ २३ गते तेश्रो मधेश आन्दोलनको क्रममा प्रहरीको गोली लागि निधन भएका सहिद रामकृष्ण राउतको स्मृतिमा  प्रतिष्ठानले छात्रवृत्ति कोष स्थापना गरी  दुईजना जेहनदार विद्यार्थीलाई  प्रत्येक वर्ष छात्रवृत्ति  प्रदान गर्दै आएका छन् ।