सप्तरीका नवागन्तुक एसपी खतिवडा द्धारा पत्रकारसंग भेटघाट 

राजविराज । जिल्ला प्रहरी कार्यालय सप्तरीले जिल्लास्थित पत्रकारहरूसँग भेटघाट तथा परिचयात्मक कार्यक्रम गरेको छ ।

नवागन्तुक  प्रहरी उपरीक्षक (एसपी) ढकेन्द्र खतिवडाले  जिल्ला प्रहरी कार्यालय सप्तरीमा सरुवा भएर आएको अवसरमा भेटघाट तथा परिचयात्मक कार्यक्रम गरिएको हो ।भेटघाट तथा परिचयात्मक कार्यक्रममा जिल्लामा भएका गतिविधि तथा समसामयिक विषयमा छलफल गरिएको थियो । 

पत्रकार भेटघाट कार्यक्रममा बोल्दै एसपी खतिवडाले अपराध नियन्त्रण तथा जिल्लामा शान्ति सुरक्षाका लागि प्रतिबद्ध रहेको बताए । जिल्लामा शान्ति सुरक्षा कायम गर्न र अपराध नियन्त्रणमा पत्रकारहरूसँग सहकार्य गरेर अगाडि बढ्ने प्रतिबद्धता व्यक्त गरे । 

पत्रकारको सुरक्षा, सम्मान र सूचना उपलब्ध गराउने कार्यमा कमी आउन नदिने बताउँदै उनले हिजोको भन्दा  पत्रकारहरूसँगको सम्बन्ध राम्रो बनाउने प्रतिबद्धता व्यक्त गरे । 

कार्यक्रममा पत्रकार महासंघका पूर्व केन्द्रीय सदस्य अबधेश कुमार झा, पत्रकार महासंघ सप्तरीका अध्यक्ष श्रवण कुमार देव, पूर्व अध्यक्ष मुरली प्रसाद यादव, धिरेन्द्र प्रसाद साह, नेपाल पत्रकार महासंघ सप्तरीका सचिब रामनारायण विश्वास, प्रदेश परिषद सदस्य बृजमान तामाङ, जिल्ला कार्यसमिति सदस्य विद्यानन्द राम, कृष्ण कुमार मण्डलले सुझाव दिएका थिए । 

यसैगरी प्रेस मञ्च नेपाल सप्तरीका अध्यक्ष भूषण कुमार सिंह, कोषाध्यक्ष प्रवेश मिश्र, पत्रकार सौरभ यादव, लगायतकाले समेत जिल्लाको शान्ति सुरक्षाको अवस्था बारे धारणा राखेका थिए । 

तत्कालीन प्रहरी प्रमुख प्रहरी उपरीक्षक गजुसिध्दी बज्राचार्यको सरुवा भएपछि प्रहरी उपरीक्षक खतिवडा सुदूरपश्चिम प्रदेश प्रहरी कार्यालय महेन्द्रनगरबाट सप्तरी प्रहरी प्रमुखमा शुक्रबार हाजिर भएका हुन् ।