मलेठ महायज्ञमा ५ लाख भन्दा बढी श्रद्धालु आउने अनुमान

राजबिराज । राजविराज नगरपालिका ९ मलेठ स्थित श्री रामजानकी पञ्चवटी तीर्थस्थलमा हुने महायज्ञमा ५ लाख भन्दा बढी भक्तजन आउने आयोजक समितिले जनाएको छ ।

चैत १७ गते हुने महायज्ञको पूर्वसन्ध्यामा शनिवार निकालिएको कलश यात्रामा सो कुरा बताईएको हो । स्थानीय श्री रामजानकी पञ्चवटीको पवित्र जल भरेर कलश यात्रामा निस्केका थिए । महायज्ञ आयोजक मूल समितिका अध्यक्ष समेत रहेका वडाध्यक्ष जवाहर यादवले चैत १७ देखि शुरु हुने महायज्ञका लागि उक्त तीर्थस्थलमा सम्पूर्ण तयारी पुरा भएको जानकारी दिए ।

विश्‍वकल्याण हेतु तथा सनातन धर्मको रक्षागर्ने उद्देश्यले नौ कुण्डिय विष्णु महायज्ञको आयोजना गर्न लागिएको उनको भनाई छ । रोचक कुरा के छ भने उक्त रकम सोही वडावासीबाट जुटाउने आयोजकको तयारी छ । “हामी अन्य वडा, पालिका, कार्यालय र संघ संस्था कतैबाट पनि चन्दा र सहयोग लिएका छैनौ, अध्यक्ष यादवले भने, सबै खर्च वडाकै बासिन्दाबाट जुटाउने काम भइरहेको छ ।”

राजविराज नगरपालिकामा सबैभन्दा बढी जनसङ्ख्या रहेको उक्त वडामा कसैले नगद त कसैले खाद्यान्न, कपडा तथा अन्य सरसामान दिएर सहयोग गरिरहेको उनको कथन छ । महायज्ञमा भारत तथा नेपालका ख्याति प्राप्त सन्त महन्थ तथा कथावाचकको सहभागिता रहने उनले जानकारी दिएका छन् । 

महायज्ञ अवधिभर ५ लाख भन्दा बढी भक्तजन आउने अनुमान गरिएको बताएका उनले भारतको अयोध्याबाट रामकथा बाचिका देवी चन्द्रकला तथा रामजानकी पंचवटी तिर्थ स्थलका पिठाधीश बाबा भूतनाथ र उनका उत्तराधिकारी आचार्य गगन दास लगायतका सन्त महन्थबाट सिताराम नाम जप, रासलीला र रामलीला लगायतका धार्मिक कार्यक्रमहरू हुने समेत उनले जानकारी दिए ।

यज्ञलाई भव्य बनाउनका लागि धार्मिक कार्यक्रमका साथै मनोरञ्जनका लागि झुला, मौतका कुवाँ, सर्कस लगायतका विभिन्न खेल तमासा समेतको व्यवस्था गरिएको मूल आयोजक समितका सचिव भूपेन्द्र प्रसाद यादवले जानकारी दिए । महायज्ञको उद्‌घाटन आयोजक समितिका सल्लाहकार समेत रहेका राजविराज नगरपालिकाका मेयर (हाल निलम्बित अवस्था) भिमराज यादवले गर्ने कार्यक्रम तय भएको उपाध्यक्ष सुरेन्द्र यादवले जानकारी दिए ।

महायज्ञ भव्य र सभ्य बनाउन स्थानीय समाजसेवी अशोक कुमार मेहता श्रीलाल यादव, प्रदीप यादव, रामचन्द्र यादव, राधेश्याम यादव, भोला यादव, पुनम यादव, जुल्मी यादव, रामु यादव र सिताराम यादव सहित ५१ सदस्यीय मूल आयोजक समिति गठन गरिएको छ । त्यस्तै महायज्ञ स्थलमा ५२ अवतार भएको १०८ तथा विभिन्न देवी देवताका गरी कूल १५१ वटा मुर्ती निर्माण गरिएको छ ।