इस्लाम धर्मावलम्बीहरूको महान पर्व आज इद उल फित्र मनाइदै

राजबिराज । इस्लाम धर्मावलम्बीले आज इद मनाउँदै छन् । एक महिना लामो रमादान पर्व रोजा पूरा भएको खुशियालीमा इद उल फित्र मनाउन लागिएको हो । इद उल फित्रका अवसरमा एक आपसमा खुशियाली साट्दै शुभकामना आदानप्रदान गर्ने प्रचलन छ ।

बिहान ४ बजे भोजन (सहरी) गरेर निर्जल व्रत सुरु गर्ने र साँझ ६ बजे भोजन (इफ्तारी) गर्दै आएको यो परम्परालाई अन्त्य गर्दै आज चैत १८ गते ईद मनाइँदैछ ।

सप्तरीको गाउँ र शहरका मुस्लिम समुदायले ईदको अवसरमा मस्जिद र इदगाह क्षेत्रमा प्रवेशद्वार निर्माण गरी झिलिमिली सजावट गरेका छन् । राजबिराज नगरपालिका मुख्य बजार सहित वडा  ३, ४, लगायतका क्षेत्रहरूमा विशेष सजावट र स्वागत द्वारहरू निर्माण गरिएको छ ।

रमादान महिना गरिब, दीनदुःखी र असहायका लागि राम्रो होस् भन्ने दृष्टिकोणबाट अल्लाहले विशेष व्यवस्था गरेको मानिन्छ । इदका अवसरमा सरकारले आज सार्वजनिक बिदा दिएको छ ।